नेपाल र चीनबीच २० वटा सम्झौता पत्रमा हस्ताक्षर (समझदारीपत्रको सूचि)

प्रकाशित मिति : आइतवार, अशोज २६, २०७६

काठमाडौं । नेपाल र चीनबीच आइतबार २० वटा सम्झौता तथा समझदारीपत्रमा हस्ताक्षर भए। सम्झौता तथा समझदारीपत्रमा पूर्वाधार विकास देखि शिक्षा तथा स्वास्थ्य क्षेत्रलाई समेटिएको छ।

आइतबार काठमाडौंको होटल सोल्टीमा बसेको नेपाल–चीन द्विपक्षिय उच्चस्तरीय प्रतिनिधिमण्डलको बैठकमा ती सम्झौता तथा समझदारी पत्रमा हस्ताक्षर गर्ने सहमति जुटेको थियो। बैठमा नेपालको नेतृत्व प्रधानमन्त्री केपी शर्मा ओली र चीनको नेतृत्व चिनियाँ राष्ट्रपति सी चिनफिङले गरेका थिए।

प्रधानमन्त्री ओली र राष्ट्रपति सीको उपस्थितीमा दुई देशका सम्बन्धीत निकायका अधिकारीले ती सम्झौता तथा समझदारीपत्रमा हस्ताक्षर गरेका थिए।

चार वटा सम्झौता तथा समझदारीपत्रमा दुई देशका परराष्ट्रमन्त्रीले हस्ताक्षर गरेका थिए भने बाँकीमा सम्बन्धीत मन्त्रालयका अधिकारीहरुले हस्ताक्षर गरेका थिए।

सम्झौता तथा समझदारीपत्रमा चीनको तर्फबाट चिनियाँ विदेशमन्त्री वाङ यी, नेपालको लागि चिनियाँ राजदूत होउ याङकी, चिनियाँ उपबाणिज्य मन्त्रीले हस्ताक्षर गरेका थिए। यस्तै, नेपालको तर्फबाट परराष्ट्र मन्त्री प्रदीपकुमार ज्ञवाली, परराष्ट्र सचिव शंकरदास वैरागी, अर्थ सचिव, वाणिज्य सविच, उद्योग सचिव, शिक्षा सचिव, कृषि सचिव लगायतले सम्झौता तथा समझदारीपत्रमा हस्ताक्षर गरेका थिए।

 

 

 

 

 

यी हुन् नेपाल र चीनबीच भएका १८ समझदारी र दुई लेटर अफ एक्सचेन्ज

१, नेपाल सरकार र जनवादी गणतन्त्र चीनबीच सीमा व्यवस्थापन प्रणालीबारे सम्झौता भएको छ।

२, नेपाल सरकार र जनवादी गणतन्त्र चीनबीच प्रशासनिक क्षमता वृद्धिका लागि सहकार्य आदानप्रदान गर्ने समझदारी (एमओयू) भएको छ।

३, नेपाल र चीनबीच आपराधिक मामिलामा दुईपक्षीय कानुनी सहायताको सन्धि भएको छ।

४, नेपाल र चीनबीच सगरमाथा/चोमोलोङ्माको संरक्षणमा सहकार्य गर्ने समझदारी भएको छ।

५, लगानीका मुख्य परियोजनालाई प्रवद्र्धन गर्ने र नेपालको राष्ट्रिय योजना आयोग र चीनको राष्ट्रिय विकास तथा पुनर्संरचना आयोगबीच उत्पादक क्षमता वृद्धिमा सहकार्य गर्ने समझदारी भएको छ।

६, चीनको छेन्दुमा नेपालको कन्सुलेट जनरल (वाणिज्य दूतावास) स्थापना गर्नेसम्बन्धी सम्झौतापत्र आदानप्रदान भएको छ।

७, नेपाल–चीन सिमापार रेलमार्ग परियोजनाको सम्भाव्यता अध्ययनका लागि नेपालको भौतिक पूर्वाधार तथा यातायात मन्त्रालय र चीनको यातायात मन्त्रालयबीच समझदारी भएको छ।

८, काठमाडौं महानगरपालिका र चीनको नाञ्जिङ सहर बीच भगिनी सम्बन्ध स्थापना गर्ने सम्झौता भएको छ।

९, बुटवल उपमहानगरपालिका र चीनको जियान सहरबीच भगिनी सम्बन्ध स्थापना गर्ने सम्झौता भएको छ।

१०, परम्परागत औषधिमा सहकार्य गर्न नेपालको स्वास्थ्य र जनसंख्या मन्त्रालय तथा चीनको नेशनल एडमिनिस्ट्रेसन अफ ट्रेडिसनल चाइनिज मेडिसिनबीच समझदारी भएको छ।

११, नेपालको गृह मन्त्रालय र चीनको आकस्मिक व्यवस्थापन मन्त्रालयबीच विपद् जोखिम न्यूनीकरण तथा आकस्मिक सेवामा सहकार्य गर्ने समझदारी भएको छ।

१२, चीनको सुप्रिम पिपुल्स प्रोसिक्युटर कार्यालय र नेपालको महान्यायाधिवक्ताको कार्यालयबीच सहकार्य गर्ने समझदारी भएको छ।

१३, नेपालको त्रिभुवन विश्वविद्यालय र चीनको कन्फ्युसियस इन्स्टिच्युट हेडक्वार्टर्सबीच त्रिभुवन विश्वविद्यालयमा कन्फ्युसियस इन्स्टिच्युट स्थापना गर्ने सम्झौता भएको छ।

१४. नेपालको कृषि विभाग र चीनको भन्सार सामान्य प्रशासनबीच साइट्रस(अमिलो स्वादका) फलफूल चीन निर्यातका लागि बिरुवालाई स्वस्थ राख्नेसम्बन्धी मापदण्डको कार्यविधि निर्माण गर्ने समझदारी भएको छ।

१५. नेपालको उद्योग, वाणिज्य तथा आपूर्ति मन्त्रालय र चीनको वाणिज्य मन्त्रालयबीच व्यापारबारे छलफल गर्न दुवै देशका प्रतिनिधि सहभागी हुने संयुक्त संयन्त्र बनाउने समझदारी भएको छ।

१६. नेपालमा चीनले सहयोग गरेको भूकम्प सुपरिवेक्षण सञ्जाल परियोजनाका लागि वितरण र स्वीकृतिपत्रमा समझदारी भएको छ।

१७. नेपालको अर्थ मन्त्रालय र चीनको वाणिज्य मन्त्रालयबीच लगानीमा सहकार्यका लागि दुवै देशको प्रतिनिधि सहभागी हुने गरी कार्यदल स्थापना गर्ने समझदारी भएको छ।

१८. नेपालको अर्थ मन्त्रालय र चीनको अन्तर्राष्ट्रिय विकास सहकार्य संस्थाबीच सुरुङ निर्माणमा सहकार्य गर्ने समझदारी भएको छ।

१९. नेपाल–चीन सीमा सुरक्षा सामग्री र कार्यालय सामग्रीका लागि सम्झौतापत्र आदानप्रदान भएको छ।

२०. चीनको सहयोगमा उपत्यकामा सञ्चालन हुने खानेपानी आपूर्ति सुधार परियोजनाको सम्भाव्यता अध्ययनका लागि बैठकको ‘माइन्युट’का लागि समझदारी भएको छ।